गजल (सहिदले बगाएको ...)

                      गजल 

                        - नवराज कँडेल 

सहिदले बगाएको रगत हो प्रजातन्त्र 
आस्थाहरु मौलाउने जगत हो प्रजातन्त्र 

हाँसी-हाँसी फाँसी चढ्ने गौरवमय क्षण हेर
राष्ट्र जाग्ने कुर्बानीको लागत हो प्रजातन्त्र 

स्वतन्त्रता-मानवता पैतलाले किच्नेहरु
सुनिराख युग फेर्ने तागत हो प्रजातन्त्र 

समानताको राँको बाल्दै अँध्यारोमा ज्योति छर्ने
एउटा नौलो बिहानीको आगत हो प्रजातन्त्र 

शान्तिनगर ३, दाङ ।