गजल (कसरी भन्नु खै हृदयमा पारिलो ..)

                            गजल 

                                              - नवराज कँडेल

कसरी भन्नु खै हृदयमा पारिलो घाम छ यतिबेला
उदास मेरो बस्तीमा अँध्यारै याम छ यतिबेला

कहिले पढ्न सकिन्छ संगै सबै-सबैले समयको चिट्ठी
खुल्ला पाना कसैसंग चाहिं बन्द खाम छ यतिबेला

ए युवा किन मौन छौ देखेनौ कि तिम्रै छाति माथि
घोडा हरपल हिटलरको यहाँ बेलगाम छ यतिबेला

आस्था टुक्रिएपछि चर्किएपछि विश्वासको ऐना
सडक भरि वर्तमान विरुद्ध सिंगो लाम छ यतिबेला

कहिले थवाङ बनेर भत्कियौं कहिले दाङ बनेर तप्कियौं
यद्यपि आँखा भरि भोजपुर म्याग्दी र अछाम छ यतिबेला

कोशी बग्दैछ बुद्ध खोज्दै सुकरात खोज्दै कर्णाली बग्दैछ
तर किन उसैगरी आँसुको नारायणी अविराम छ यतिबेला

२०६०/१२/२८
खैरहनी, चितवन

(आदर्श राष्ट्रिय विविध साहित्यिक पत्रिकाद्वारा मिति २०६१/०२/०२ मा गैंडाकोट, नवलपरासीमा आयोजित खुल्ला गजल प्रतियोगितामा प्रतियोगी भई प्रथम भएको गजल)